نشرت احدى ضحايا الزلزال في سوريا عبر حسابها على موقع "فيسبوك" صورة لأمها وأختها بعد وفاتهما جراء الزلزال، وبعد انقاذها أيضاً من تحت الركام الذي باتت تحته لساعات.
وأرفقت الصورة بمنشور ننقله اليكم بحرفيته:
"إنا لله وإنا إليه راجعون أنا بحياتي ما عشت اصعب من هالأيام
اصعب ايام حياتي (أثر الزلزال )شفت الموت أنا وأهلي بعيوني شفت الموت تحت الانقاض مافي نفس ما في ضو مافي هوا ابدا ضلوعك عم تتكسر مافيكي تتحركي لانو اي غلط بتخرب الدينا ع راسنا الكلمة يلي كنت عم اسمعها
(اشهد ان لا اله الله واشهد أن محمد رسول الله) فجأة اختفى صوت امي صوت اختي
نفس امي نفس اختي
الدم عم ينزف والدم لبسني لبس من فوق لتحت طلعت ع أختي كلها دم طلعت بعيونها كانت متوفية بحضني ومخباية راسها بحضني هون فقدت الوعي بابا قلي كرمال الله ماعاد الي غيرك تنفسي من هالطاقه كرمال الله يابنتي لا تتركيني اختك وامك تركوني انت عيشي كرمالي حاولت ضل وعيانه ضالينا ساعتين تحت الدمار وبابا ينادي كرمال الله ساعدونا
لحتى اجو العالم سحبوني وسحبو ابوي واخدوني عالمشفى بس عندي أمل اختي وامي يجو عايشين بس للأسف كان حلم
(فقدت أمي وأختي) فقدت روحي وكل شي حلو بحياتي فقدت البسمة والفرح وفقدت الأمان والحنية فقدت الرفيقه والسند
رجعت بنت من صفر لا أم ولا أخت ولا بيت".
